ხმაურით გრძელდება იურიდიულ საკითხთა საპარლამენტო კომიტეტის სხდომა, რომელზეც „უცხოური გავლენის გამჭვირვალობის შესახებ“ კანონპროექტის პირველი მოსმენით განხილვა მიმდინარეობს.
ამჯერად, სხდომათა დარბაზიდან კომიტეტის თავმჯდომარე ანრი ოხანაშვილმა ოპოზიციონერი დეპუტატები: პაატა მანჯგალაძე, ხატია დეკანოიძე, ლევან ხაბეიშვილი და გიორგი ვაშაძე გააძევა.
ანრი ოხანაშვილის განმარტებით, გადაწყვეტილების მიზეზი მათი მხრიდან თავხედობა და ყვირილია.
„არაერთხელ მოგიწოდეთ წესების დაცვისკენ. არაერთგზის დაარღვიეთ“, - აღნიშნა მან.
პარლამენტის იურიდიულ საკითხთა კომიტეტის სხდომაზე „უცხოური გავლენის გამჭვირვალობის შესახებ“ კანონპროექტის განხილვა დილიდან მიმდინარეობს. დეპუტატებს კანონპროექტის დეტალები „ქართული ოცნების“ აღმასრულებელმა მდივანმა, საპარლამენტო უმრავლესობის ლიდერმა, მამუკა მდინარაძემ გააცნო. კითხვებზე პასუხის გაცემის პროცესში კანონპროექტის განხილვა ფიზიკურ დაპირისპირებაში გადაიზარდა.
| სარეკლამო ადგილი - 11 650 x 60 |
