დავით ქართველიშვილი სალომე ზურაბიშვილზე: რა საჭიროა აგენტოკრატების მარიონეტისთვის მისთვის უჩვეულო სფეროში - სიმართლის მხარეზე გადანაცვლება, როდესაც არსებობს რუსეთი და „რუსული"

154 28 თებერვალი 2024, 15:13

საქართველოს პრეზიდენტის ვიზიტს დიდ ბრიტანეთში და იქ გაკეთებულ განცხადებებზე წერს სოციალურ ქსელში „ხალხის ძალის“ წევრი დავით ქართველიშვილი. მისი თქმით, პრეზიდენტი მორიგ დეზინფორმაციას ავრცელებს, როცა საუბრობს იმაზე, რომ რუსეთის მიერ არჩევნებში ჩარევით საქართველო რეალური საფრთხის წინაშე დადგება. ქართველიშვილის თქმით, რუსეთის ფაქტორთან შეგუება ჩვენ უკვე 33 წელიწადია გვიწევს და ამის შესახებ ამ ქალბატონის შეხსენება ჩვენ არ გვჭირდება.

„დიდ ბრიტანეთში მყოფმა ნაცების მესამე პრეზიდენტმა მორიგი დეზინფორმაცია გაავრცელა მისთვის უცხო ქვეყნის - საქართველოს შესახებ. Sky News-თან ინტერვიუში მან განაცხადა, რომ ოქტომბერში საქართველოს საპარლამენტო არჩევნებს თითქოსდა ერთადერთი საგარეო საფრთხე ემუქრება: „რუსეთის მიერ არჩევნებში ჩარევით და ჰიბრიდული ომის გაჩაღებით“.

მისი ეს განცხადება ემსახურებოდა დანარჩენი, რეალური, გამოვლენილი და აშკარა საგარეო საფრთხეების დაჩრდილვას და ძირითადი ყურადღების გადატანას ნაცნობი, „რუსული არჩევნების" მიმართულებით. ეს არის ნაცების მესამე პრეზიდენტის მიერ შემოგდებული ახალი საარჩევნო ბრენდი. სწორედ ამ სტიგმის გავრცელებას ემსახურებოდა მისი ლონდონური ვოიაჟი. რა თქმა უნდა, არც ერთ სიტყვა დასავლეთის მიერ მილიარდობით დახარჯულ ფინანსურ მცდელობაზე 2020-2021 წწ. არჩევნების შედეგებზე სიცრუეზე აგებული ზეგავლენების მოხდენაზე; არც ერთი სიტყვა USAID-ისა და სხვა არაერთი საერთაშორისო სპონსორის მიერ სახელმწიფო გადატრიალების მომზადებაში შეტანილი წვლილის შესახებ; არც ერთი სიტყვა NDI, IRI თუ Edison-ის მხრიდან წინასაარჩევნოდ არაერთ გაყალბებულ კვლევაზე; არც ერთი სიტყვა გამყალბებელ ISFED-ზე და ა.შ. რა საჭიროა აგენტოკრატების მარიონეტისთვის მისთვის უჩვეულო სფეროში - სიმართლის მხარეზე გადანაცვლება, როდესაც არსებობს რუსეთი და „რუსული": ოცნება, კანონები, სასამართლო, სარწმუნოება, შობა, არჩევნები. რუსეთის ფაქტორთან შეგუება ჩვენ უკვე 33 წელიწადი გვიწევს და ამის შესახებ ამ ქალბატონის შეხსენება ჩვენ არ გვჭირდება. განსაკუთრებით იმ წინაპრების შთამომავალ ქალბატონს, რომლებმაც ბოლშევიკური რუსეთის ხელში მიატოვეს საქართველო და რომლის ახალი სამშობლო საფრანგეთი საბჭოთა ქართველებმა, ბერლინის აღებით საკუთარი სიცოცხლის ფასად გაათავისუფლეს ფაშისტებისაგან. გაათავისუფლეს იმისთვის, რომ დღეს მან, როგორც ჩანს, შური იძიოს მისთვის მიუღებელ ქვეყანაზე და მის „საბჭოური, რუსული" წარსულის მქონე შვილებზე," - წერს დავით ქართველიშვილი.

სარეკლამო ადგილი - 11
650 x 60