215
10 დეკემბერი 2023, 20:54
„ხალხის ძალის“ ერთ-ერთ ლიდერს დიმიტრი ხუნდაძეს ექს-პრემიერ გიორგი გახარიას გულწრფელობის არ სჯერა. როგორც მან ჟურნალისტებს განუცხადა, გახარიას, თუ რამე იცოდა, ეს უნდა ეთქვა თანამდებობებზე ყოფნის დროს.
„არ მჯერა ოპოზიციაში დავაჟკაცებული ხალხის და ამის არ სჯერა არც საზოგადოებას. მით უმეტეს, თუკი ის რეალურად ფლობს ამგვარ ინფორმაციას, მას ჰქონდა ვალდებულება, როცა ის იყო არაერთ თანამდებობაზე და იყო ქვეყნის პრემიერ-მინისტრი, ეს უნდა ეთქვა თავიდანვე და არა ახლა, სასპეკულაციოდ, ახლა დამაჯერებლობის ხარისხი არის ნული,“ - განაცხადა დიმიტრი ხუნდაძემ.
მანვე გაიხსენა უმრავლესობის შეხვედრა, სადაც სწორედ ნაციონალური მოძრაობის მაშინდელი ლიდერის ნიკა მელიას საკითხი განიხილებოდა. „გახარიას უუნარობის არაფერი ეტყობოდა არც მაშინ და არ ეტყობა არც დღეს, მაგრამ ის, რომ დამოკიდებული იყო, მან თავისი ქმედებით დაადასტურა. სწორედ ამის ეჭვი გამიჩნდა მაშინ, უმრავლესობის დახურულ შეხვედრაზე, როდესაც გახარია ითხოვდა ერთს და სამი დღის შემდეგ აკრიტიკებდა იმას, რასაც დახურულ შეხვედრაზე თითქოსდა თვითონ ითხოვდა. სამ დღეში ასეთი ღირებულებითი ცვლილებები არ ხდება. ე.ი. ემსახურები რაღაც მიზანს,“ - დასძინა დიმიტრი ხუნდაძემ.
| სარეკლამო ადგილი - 11 650 x 60 |
