„დევი ჭანკოტაძემ გააჟღერა ძალიან მზაკვრული გეგმა - პარლამენტის წევრი პროვოკაციულ განცხადებას აკეთებს, მსხვერპლზე საუბრობს“, - ასე გამოეხმაურა პარტია „ხალხის ძალის“ აღმასრულებელი მდივანი, გურამ მაჭარაშვილი „ნაციონალური მოძრაობის“ წევრის, დევი ჭანკოტაძის მიერ პარლამენტში გაკეთებულ განცხადებას, რომლის თანახმადაც თუ კანონპროექტს უკან არ გაიწვევენ, ეს ძალიან ცუდ მოვლენებს გამოიწვევს.
როგორც მაჭარაშვილმა მედიასთან საუბარში თქვა, ოპოზიციის ნაწილი რევოლუციასა და მსხვერპლზე საუბრობს. დეპუტატის თქმით, საზოგადოება ფრთხილად იყოს.
„დევი ჭანკოტაძემ გააჟღერა ძალიან მზაკვრული გეგმა, რაზეც ჩვენ ვსაუბრობთ ხოლმე. ის ამბობს, რომ ეს კანონი თუ არ გაიწვიეთ, იქნება მსხვერპლი. წარმოიდგინეთ, ამაზე მეტი პროვოკაციული განცხადება - იმ გეგმას აჟღერებს, რაც შესაძლოა რადიკალურ ოპოზიციას ჰქონდეს. პარლამენტის წევრი, ნაცვლად იმისა, რომ საზოგადოებას მოუწოდებდეს „გააპროტესტეთ, მაგრამ მშვიდობიანად,“ პროვოკაციულ განცხადებას აკეთებს, მსხვერპლზე საუბრობს . რევოლუცია, მსხვერპლი, სისხლი, უბედურება - ეს არის ამ ხალხის გეგმა. ეს უნდა გავაჟღეროთ და ეს უნდა იყოს გამჭვირვალე. ვამხილოთ ეს ხალხი, რომ საზოგადოება იყოს ფრთხილად“, - აღნიშნა გურამ მაჭარაშვილმა.
| სარეკლამო ადგილი - 11 650 x 60 |
