სოციოლოგმა იაგო კაჭკაჭიშვილმა საქართველოს პირველი არხის გადაცემაში „კვირის ინტერვიუ“ განაცხადა, რომ გიორგი გახარიას შეუძლია, მაღალი რეიტინგი შეინარჩუნოს, მაგრამ ეს იმაზე იქნება დამოკიდებული, როგორი იქნება დაბრუნების შემდეგ მისი პოლიტიკური პოზიციონირება საზოგადოებაში.
„გააჩნია, რომ დაბრუნდება, შეინარჩუნებს თუ არა თვითმყოფადობას და ჩამოყალიბდება თუ არა, როგორც ხელისუფლების, ისე „ნაციონალური მოძრაობის“ ალტერნატივად. ამ შემთხვევაში მას შეუძლია, მაღალი რეიტინგი შეინარჩუნოს, ხოლო თუ ეს დამოუკიდებლობა ილუზორული და მოჩვენებითია, ცხადია, მისი რეიტინგი დაიწევს“, – განაცხადა კაჭკაჭიშვილმა.
კაჭკაჭიშვილმა აღნიშნა, რომ IRI-ის კვლევაში პარლამენტის ბოიკოტის მიმართ სკეპტიკური დამოკიდებულება იმან გამოიწვია, რომ საზოგადოებრივ აზრზე გავლენას ასევე ახდენს პარლამენტის ბოიკოტირებასთან დაკავშირებით საერთაშორისო პარტნიორების პოზიცია.
„ჩვენ ვხედავთ, რომ საერთაშორისო საზოგადოება ოპოზიციას ლამის უპირობოდ მოუწოდებს, შევიდეს პარლამენტში. ანუ, ინსტიტუციური ბრძოლის ინსტრუმენტი პარლამენტზე გავლით, ან პარლამენტში ბრძოლის ინსტრუმენტი, რომელიც ევროპული ღირებულებებიდან ერთ-ერთი წამყვანია, რაღაცნაირად, გადმოდის ამომრჩევლებზეც და ამან გამოიწვია პარლამენტის ბოიკოტის მიმართ სკეპტიკური დამოკიდებულება, NDI-ის კვლევასთან შედარებით“, – განაცხადა იაგო კაჭკაჭიშვილმა.
| სარეკლამო ადგილი - 11 650 x 60 |
