ბერლინში 2019 წელს მოკლული ზელიმხან ხანგოშვილის საქმეზე დამატებითი ინფორმაციის მიწოდების თხოვნით გერმანიის სხვადასხვა ორგანოებმა რუსეთის ხელისუფლებას 17-ჯერ მიმართეს. როგორც „დოიჩე ველე“ წერს, ამის შესახებ მოსკოვში რუსეთის საგარეო საქმეთა მინისტრთან გამართულ ერთობლივ პრესკონფერენციაზე გერმანიის საგარეო საქმეთა მინისტრმა ჰაიკო მაასმა განაცხადა.
მაასის თქმით, არაერთი მიმართვის მიუხედავად, მოსკოვის მხრიდან რეაგირება არ ყოფილა. როგორც გერმანელმა დიპლომატმა აღნიშნა, გერმანიამ რუსეთს სამართლებრივი დახმარების აღმოჩენის თხოვნით ოფიციალურად ორჯერ მიმართა, რაზეც არასრული პასუხი მიიღო.
ზელიმხან ხანგოშვილის მკვლელობასთან დაკავშირებით მოსკოვისთვის შესაძლო შედეგებზე საუბრისას, მაასმა აღნიშნა, რომ ეს დამოკიდებულია ბერლინის სასამართლოს საბოლოო გადაწყვეტილებაზე. მისი თქმით, ამჟამად საქმეს სასამართლო სწავლობს.
„ჩვენ, გერმანიის მთავრობამ გადავწყვიტეთ, რომ სასამართლოს გადაწყვეტილებას დაველოდოთ. ის გადაწყვეტილება, რომელსაც სასამართლო გამოიტანს, ჩვენი რეაქციის საფუძველი გახდება. თუ სასამართლო მკვლელობასთან რუსეთის კავშირს დაადგენს, რა თქმა უნდა, ჩვენი რეაქციაც შესაბამისი იქნება“, - განაცხადა ჰაიკო მაასმა.
თავის მხრივ, რუსეთის საგარეო საქმეთა მინისტრმა სერგეი ლავროვმა განაცხადა, რომ ბერლინში მომხდარ მკვლელობასთან დაკავშირებით რუსეთმა გერმანული მხარის ყველა კითხვას უპასუხა.
„ჩვენმა უწყებებმა გერმანულ მხარეს გადასცეს ყველაფერი, რაც კი შეიძლებოდა. ახლა ჩვენ გვსურს, ვნახოთ რაიმე მტკიცებულება იმ განცხადებებისა, რომლებიც გერმანიის გენერალურმა პროკურატურამ გააკეთა, როდესაც მკვლელობასთან რუსეთის კავშირზე განაცხადა. ჯერჯერობით კონკრეტული პასუხი არ მიგვიღია“, - განაცხადა ლავროვმა.
წარმოშობით ჩეჩენი, საქართველოს მოქალაქე ზელიმხან ხანგოშვილი ბერლინში 2019 წლის აგვისტოში მოკლეს. 2020 წლის ივნისში გერმანიის ფედერალურმა პროკურატურამ რუსეთის ხელისუფლება ხანგოშვილის მკვლელობის შეკვეთაში დაადანაშაულა.
სარეკლამო ადგილი - 11 650 x 60 |