25 ივლისს, ოკუპანტების მიერ სოფელ მეჯვრისხევში დაკავებული დაკავებული მალხაზ ლეჟავა, ოკუპანტებმა დაკავებიდან რამდენიმე საათში გაათავისუფლეს. ის ამ დროისთვის რუსთავში, საკარანტინო სივრცეში იმყოფება.
„25 ივლისს მოქალაქე მალხაზ ლეჟავას უკანონოდ დააკავეს. ფაქტთან დაკავშირებით ინფორმაცია მიეწოდა ევროკავშირის სადამკვირვებლო მისიას, ამოქმედდა ცხელი ხაზი. შედეგად, გუშინვე მოხდა ლეჟავას გათავისუფლება. იგი ცენტრალური ხელისუფლების მიერ კონტროლირებად ტერიტორიაზე, კარანტინში იმყოფება“, - აცხადებენ სახელმწიფო უსაფრთხოების სამსახურში.
ამ დრომდე ოკუპანტების ტყვეობაში რჩება საქართველოს ორი მოქალაქე. ხვიჩა მღებრიშვილს დე ფაქტო ცხინვალის სასამართლომ ორთვიანი პატიმრობა შეუფარდა. ის სოფელ მეჯვრისხევიდან 3 ივლისს გაიტაცეს. ოკუპირებული ცხინვალის ე.წ. უსაფრთხოების სამსახურის ინფორმაციით, ის „მათ ტერიტორიაზე“ ღამურების შესაგროვებლად გადავიდა. ე.წ. სახელმწიფო უშიშროების კომიტეტის ცნობით, მიმდინარე თვის დასაწყისში დაკავებული ხვიჩა მღებრიშვილი ერთი ღამურის სანაცვლოდ 5 000 დოლარის აღებას ცდილობდა.
ოკუპანტების მიერაა დაკავებული საქართველოს კიდევ ერთი მოქალაქე. ზაზა გახელაძე, რომელიც 11 ივლისს დაჭრეს და დააკავეს. დაჭრილი ზაზა გახელაძე ცხინვალის საავადმყოფოში, კარანტინში გადაიყვანეს და ცოტა ხნის წინ, წინასწარი დაკავების იზოლატორში მოათავსეს. საოკუპაციო ხაზთან მომხდარ ინციდენტთან დაკავშირებით ინფორმირებულია ევროკავშირის სადამკვირვებლო მისია და ამოქმედებულია ცხელი ხაზი.
| სარეკლამო ადგილი - 11 650 x 60 |
