ოკუპირებული ცხინვალის ე.წ. უმაღლესმა სასამართლომ ცოლ-ქმარ ლიპინებს, რომლებიც ე.წ. უშიშროების კომიტეტმა გასული წლის ივლისში საქართველოს სასარგებლოდ ჯაშუშობის ბრალდებით დააკავეს, განაჩენი გამოუტანა.
დე ფაქტო უშიშროების კომიტეტის ცნობით, ე.წ. პრეზიდენტის ადმინისტრაციის ყოფილი მაღალჩინოსანი სერგეი ლიპინი და მისი მეუღლე ნანული ლიპინა (ჭულუხაძე) დე ფაქტო სასამართლომ სახელმწიფო ღალატში დამნაშავედ ცნო. ქმარს 16 წლით, ცოლს კი 13 წლით თავისუფლების აღკვეთა მიესაჯათ, რომლებმაც ასევე, უნდა გადაიხადონ ჯარიმა 500 და 300 ათასი რუსული რუბლის ოდენობით.
ცოლ-ქმარმა დანაშაული აღიარა და განაჩენის გასაჩივრებას არ აპირებენ.
დე ფაქტო უშიშროების კომიტეტის ინფორმაციით, მათი ქალიშვილი, რომელიც ასევე „სახელმწიფოს ღალატშია“ ეჭვმიტანილი, საქართველოს ხელისუფლების მიერ კონტროლირებად ტერიტორიაზე იმყოფება.
ე.წ. გენპროკურატურის ინფორმაციით, სერგეი ლიპინმა საქართველოს სპეცსამსახურებს მიაწოდა სადაზვერვო მონაცემები, რომლებიც 2008 წელს საქართველოს არმიამ გამოიყენა.
ოკუპირებული ცხინვალის ინფორმაციით, ლიპინმა აღიარა, რომ საქართველოს სპეცსამსახურებთან 2006 წლიდან თანამშრომლობდა.
| სარეკლამო ადგილი - 11 650 x 60 |
