„ტოიოტა ქამრში” მყოფ პირებს საზოგადოებამ და გიორგი შაქარაშვილის ბიძამ დაუმძიმა ბრალდება, ვინაიდან, არათუ ბრალდებულებად, არამედ მსჯავრდებულებად აქციეს ჯერ კიდევ ერთი თვის წინ, - განაცხადა შაქარაშვილის განზრახ მკვლელობაში ბრალდებულ არჩილ გაგნიძის ადვოკატმა ვასილ მამულაშვილმა.  

„მოლოდინი, რომ ბრალდება სხვანაირად მოიქცეოდა, არ გვქონია. ჩვენ ვნახეთ რაღაც მონათხრობები, ვარაუდები, რომლებიც არაერთხელ მოვისმინეთ ბატონ მირიან ნიკოლაძისგან, მისი საუბარი გადაიტანა პროკურატურამ და გამოსცა დადგენილება პირის ბრალდების შესახებ. თუმცა ეს არაფერს არ ნიშნავს, პირი დამნაშავედ ცნობილი ხდება მას შემდეგ, რაც სასამართლო გამოიტანს გამამტყუნებელ განაჩენს და ეს გადაწყვეტილება არის არასწორი. ამას უარყოფითი ეფექტი ექნება, როგორც პროკურატურისთვის, ასევე დაზარალებულისთვის, ვინაიდან, ჩვენ დარწმუნებული ვართ, რომ ჩვენი დაცვის ქვეშ მყოფების მიმართ სასამართლოში დადგება გამამართლებელი განაჩენი”, - განაცხადა ვასილ მამულაშვილმა.

 ცნობისთვის, გიორგი შაქარაშვილის საქმეზე „ტოიოტა ქამრის“ 6 მგზავრიდან ხუთს: ვახტანგ ჩიქოვანს, არჩილ გაგნიძეს, ნიკოლოზ რევაზიშვილს და ორ არასრულწლოვანს ბრალი განზრახ მკვლელობის მუხლით დაუმძიმდა.