ჩემთვის უდიდესი პატივი იყო მშობლიურ რეგიონში მუშაობა, ხვალიდან ვტოვებ მხარის რწმუნებულის პოსტს, იმისთვის, რომ ახალი გამოწვევებისთვის მზადება დავიწყო, - განაცხადა შიდა ქართლის სახელმწიფო რწმუნებულმა გიგი ხოჯევანიშვილმა უფლისციხის მუზეუმ-ნაკრძალში გამართულ გამოსამშვიდობებელ ღონისძიებაზე, ორწლიანი საქმიანობის შემაჯამებელი ანგარიშის წარდგენისას.
„ჩემთვის უდიდესი პატივი იყო იმ რეგიონში მუშაობა, სადაც დავიბადე და გავიზარდე, აქედან გამომდინარე, საჭიროდ ჩავთვალე, რეგიონში მცხოვრებ ადამიანებთან, იმ ორგანიზაციებთან, პარტნიორებთან, სხვადასხვა კომფესიის წარმომადგენლებთან, ადგილობრივ ხელისუფლებასთან, საერთაშორისო ბიზნესსექტორთან მქონოდა შემაჯამებელი შეხვედრა და მათთვის მიმეწოდებინა ინფორმაცია იმ პროექტების შესახებ, რომელიც შიდა ქართლში განხორციელდა. დამეთანხმებით, ციფრები და შედეგები მართლაც შთამბეჭდავია, რისთვისაც მადლობას ვუხდი ამ პროცესში ჩართულ თითოეულ ადამიანს. რა თქმა უნდა, რეგიონში რჩება გამოწვევები, რომლებსაც ჩვენი ხელისუფლება აუცილებლად გაუმკლავდება, მაგრამ ამჯერად, ჩემს მაგივრად ამ პოზიციაზე სხვა ადამიანი იქნება. ხვალიდან ვტოვებ ამ საპატიო პოსტს, იმისთვის, რომ ახალი გამოწვევებისთვის მზადება დავიწყო. სახელმწიფო რწმუნებულის მოვალეობას ჩემი ერთ-ერთი მოადგილე შეასრულებს“, - განაცხადა გიგი ხოჯევანიშვილმა.
გიორგი ხოჯევანიშვილი შიდა ქართლის რწმუნებულის თანამდებობაზე 2018 წელს დაინიშნა.
მომავალ საპარლამენტო არჩევნებში იგი გორისა და კასპის გაერთიანებულ საარჩევნო ოლქში „ქართული ოცნება - დემოკრატიული საქართველოს“ მაჟორიტარ კანდიდატადაა დასახელებული.
„ქართული ოცნების“ მაჟორიტარი დეპუტატობის კანდიდატები პოლიტიკურ თანამდებობებს პირველი აგვისტოდან დატოვებენ.
სარეკლამო ადგილი - 11 650 x 60 |