22
27 მარტი 2024, 14:44
ნიკა გვარამიას საქმის განმხილველი მოსამართლე ლაშა ჩხიკვაძე „ქრონიკასთან“ სატელეფონო კომენტარში აცხადებს, რომ არ აქვს მოლოდინი, რომ მას შემდეგ, რაც სტრასბურგმა ნიკა გვარამიას სარჩელი განსახილველად არ მიიღო, ვინმე ბოდიშს მოუხდის.
„ჩემთვის პირადად რამე განსაკუთრებული მნიშვნელობა არ აქვს [რომ სტრასბურგის სასამართლომ ნიკა გვარამიას სარჩელი განსახილველად არ მიიღო]. პატივს ვცემ სტრასბურგის გადაწყვეტილებას, თუმცა ამ ეტაპისთვის ვერ გავაკეთებ კომენტარს იმაზე მეტს, რაც თავად სტრასბურგის სასამართლომ მიიღო. ნაკლები მოლოდინი მაქვს, რომ ვინმე ბოდიშს მოიხდის, თუმცა შესაძლოა, ვინმემ ის პოზიცია მაინც დააფიქსიროს, რომ ცოტა ნაჩქარევი გადაწყვეტილებები, ან შეფასებები მიიღეს. სიმართლე გითხრათ, არც ამის იმედი მაქვს. ყოველი შემთხვევისთვის, პატივს ვცემ იმ გადაწყვეტილებას, რაც სტრასბურგის სასამართლომ მიიღო და ალბათ სხვასაც მოვუწოდებ, რომ პატივი სცენ ამ გადაწყვეტილებას“, - აღნიშნა მოსამართლემ.
სტრასბურგის სასამართლომ ნიკა გვარამიას სარჩელი განსახილველად არ მიიღო. გვარამიას თბილისის საქალაქო სასამართლომ 3 წლითა და 6 თვით პატიმრობა 2022 წლის 16 მაისს შეუფარდა. 2 ნოემბერს კი თბილისის სააპელაციო სასამართლომ ის პატიმრობაში დატოვა. ნიკა გვარამია სტრასბურგის სასამართლოში სწორედ ამ საქმეს ასაჩივრებდა.
2023 წლის 22 ივნისს საქართველოს პრეზიდენტმა, სალომე ზურაბიშვილმა ნიკა გვარამია შეიწყალა.
| სარეკლამო ადგილი - 11 650 x 60 |
