ლატვიის ეროვნულ ოლიმპიურ კომიტეტში განაცხადეს, რომ ქვეყანა ბოიკოტს გამოუცხადებს 2024 წლის ოლიმპიურ თამაშებს, თუ რუს და ბელარუს სპორტსმენებს დაუშვებენ.
გასულ კვირას საერთაშორისო ოლიმპიურ კომიტეტში განაცხადეს, რომ არცერთ სპორტსმენს არ უნდა შეექმნას შეჯიბრებაში მონაწილეობის შეფერხება მხოლოდ პასპორტის გამო.
„სანამ უკრაინაში ომი გრძელდება, რუსი და ბელარუსი სპორტსმენების მონაწილეობა ოლიმპიურ თამაშებში ნებისმიერი დროშის ქვეშ მიუღებელია“, - ნათქვამია ლატვიის ეროვნული ოლიმპიური კომიტეტის განცხადებაში.
30 იანვარს, უკრაინის პრეზიდენტის ადმინისტრაციის ხელმძღვანელის მრჩეველმა მიხაილო პოდოლიაკმა განაცხადა, რომ საერთაშორისო ოლიმპიური კომიტეტი ომის, მკვლელობისა და ნგრევის ხელშემწყობია.
„საერთაშორისო ოლიმპიური კომიტეტი სიამოვნებით უყურებს, როგორ ანადგურებს რუსეთი უკრაინას და შემდეგ რუსეთს გენოციდის პროპაგანდის პლატფორმას სთავაზობს და შემდგომ მკვლელობებს ახალისებს. ცხადია, რუსულ ფულს, რომელიც ოლიმპიურ ფარისევლობას ყიდულობს, უკრაინული სისხლის სუნი არ აქვს“, - აღნიშნა პოდოლიაკმა.
| სარეკლამო ადგილი - 11 650 x 60 |
