რუსეთის საგარეო საქმეთა მინისტრმა, სერგეი ლავროვმა აშშ-ის სახელმწიფო მდივანთან, მარკო რუბიოსთან სატელეფონო საუბარი გამართა. აღნიშნულის შესახებ ინფორმაციას რუსეთის საგარეო საქმეთა სამინისტრო და აშშ-ის სახელმწიფო დეპარტამენტი ავრცელებენ.
„რუბიომ ლავროვს გადასცა იგივე გზავნილი, რომელიც აშშ-ის გუნდმა უკრაინულ დელეგაციასა და ევროპელ მოკავშირეებს პარიზში გაუზიარა: პრეზიდენტ ტრამპსა და შეერთებულ შტატებს სურთ ომის დასრულება და ახლა ყველა მხარეს წარუდგინეს მტკიცე, ხანგრძლივი მშვიდობის კონტურები. პარიზში აშშ-ის ჩარჩოს მიმართ გამოხატული დადებითი დამოკიდებულება აჩვენებს, რომ მშვიდობა შესაძლებელია, თუ ყველა მხარე შეთანხმების მიღწევაზე იქნება ორიენტირებული“, – აღნიშნულია სახელმწიფო დეპარტამენტის მიერ გავრცელებულ განცხადებაში.
რუსეთის საგარეო საქმეთა სამინისტროს ცნობით, სახელმწიფო მდივანი ლავროვს ესაუბრა პარიზში „უკრაინის, საფრანგეთისა და რიგი სხვა ევროპული ქვეყნების წარმომადგენლებთან აშშ-ის დელეგაციის კონტაქტების შესახებ“.
„რუსეთის საგარეო საქმეთა მინისტრი და სახელმწიფო მდივანი შეთანხმდნენ, რომ შეინარჩუნებენ ოპერატიულ კავშირს, მათ შორის მომავალ კვირას უკრაინულ მხარესთან ამერიკელებისა და ევროპელების მიერ დაგეგმილი შეხვედრების გათვალისწინებით“, – აღნიშნულია რუსეთის საგარეო საქმეთა სამინისტროს მიერ გავრცელებულ განცხადებაში.
| სარეკლამო ადგილი - 11 650 x 60 |
