როცა ვლაპარაკობთ დასავლურ გზასა და დასავლურ ინტეგრაციაზე, ჩვენც უნდა ვიყოთ თანასწორუფლებიანი და არა კოლონია, როგორც ეს ვიღაცას წარმოუდგენია სადღაც დასავლეთში. ჩვენ ვიქნებით ევროპული სამყაროს, ცივილიზებული, ქრისტიანული ცივილიზაციის წევრი სახელმწიფო, - განაცხადა „ხალხის ძალის“ თავმჯდომარემ, სოზარ სუბარმა ჟურნალისტებთან საუბრისას, როცა შეაფასა საქართველოში მიმდინარე პროცესების შესახებ მსოფლიოს სხვადასხვა სახელმწიფოს მხრიდან გაკეთებული შეფასებები.
„ქართული პოლიცია ადამიანის უფლებების დაცვის უმაღლესი სტანდარტით მოქმედებს, განსხვავებით იგივე ფრანგული, ან ამერიკული პოლიციისგან, რასაც ვხედავთ ამ დღეების განმავლობაში. ის რაც ხდებოდა შეერთებულ შტატებში, როდესაც პოლიცია შეიჭრა კამპუსებში (სამასზე მეტი სტუდენტი მარტო ერთ კოლუმბიის უნივერსიტეტში დააპატიმრეს), სხვადასხვა ქალაქებში, გამოვიდა პრეზიდენტი ჯო ბაიდენი და თქვა, რომ ძალადობა, კამპუსში გამაგრება, შუშების ჩამსხვრევა არ არის გამოხატვის თავისუფლება და ძალიან მკაცრად გასცემს ამას პასუხს სახელმწიფოო. ჩვენთან, როცა სხვა სტანდარტს გვიყენებენ, ამას არც მივიღებთ. როცა ვლაპარაკობთ დასავლურ გზაზე დასავლურ ინტეგრაციაზე, ჩვენც უნდა ვიყოთ თანასწორუფლებიანი და არა კოლონია, როგორც ეს ვიღაცას წარმოუდგენია სადღაც დასავლეთში. ჩვენ ვიქნებით ევროპული სამყაროს, ცივილიზებული, ქრისტიანული ცივილიზაციის წევრი სახელმწიფო და ამ შემთხვევაში ორმაგი სტანდარტი, რომ იქ, თურმე მიღებულია 5 პოლიციელი ურტყამდეს ერთ ქალს, რომელიც ზის და არც კი ინძრევა და ჩვენთან, თურმე პოლიციას უფლება არ აქვს აღკვეთოს პარლამენტის შტურმი, რა თქმა უნდა, ჩვენთან არ იქნება მიღებული“, - განაცხადა სუბარმა.
მან აღნიშნა, რომ არც ერთი პოლიციელი, რომელმაც კაპიტოლიუმზე განხორციელებულ შტურმში ადამიანი მოკლეს, არ დასჯილა. მეტიც, მისი თქმით, მოსამართლემ არც კი განიხილა ეს საქმე.
„პოლიციელები, რომლებმაც ეს მკვლელობა ჩაიდინეს, არათუ არ დასაჯეს, მოსამართლემ არც კი განიხილა მათი საკითხი, თქვა, როგორ შეიძლება განვიხილო იმ პოლიციელის საქმე, რომელიც იცავდა კაპიტოლიუმის შენობასო. ჩვენ კი, იგივე დანაშაულის ჩამდენი პირი, ნიკა მელია მაგალითად, გაგვაშვებინეს ციხიდან. ეს არის ორმაგი სტანდარტი და ჩვენ ამას არც და ვერც მივიღებთ“, - განაცხადა სოზარ სუბარმა.
| სარეკლამო ადგილი - 11 650 x 60 |
