შეერთებული შტატების ფინანსთა სამინისტრომ რუსეთის ორ მოქალაქესა და სამ რუსულ კომპანიას, ჩრდილოეთ კორეის მიერ რუსეთისათვის იარაღის მიწოდებაში მონაწილეობისთვის სანქციები დაუწესა.

ხაზინის მიერ გავრცელებული ცნობით, სანქცირებული არიან რაფაელ ღაზარიანი და მასთან დაკავშირებული კომპანიები: „ტრანს კაპიტალი“ და „რაფორტი“, ისევე როგორც ალექსეი ბუდნევი და მისი კომპანია „ტექნოლოგია“.

„გადაწყვეტილება ასახავს ჩვენს სურვილს, ხელი შევუშალოთ ჩრდილოეთ კორეის სამხედრო თანამშრომლობის გაღრმავებას რუსეთთან“, - ნათქვამია განცხადებაში და აღნიშნულია, რომ შეერთებული შტატები კვლავაც მიიღებს ზომებს პასუხისმგებლობის დასაკისრებლად მათთვის, ვინც ცდილობს ხელი შეუწყოს იარაღისა და სხვა მასალის მიწოდებას, რათა რუსეთმა უკრაინის წინააღმდეგ ომის წარმოება შეძლოს.