32
15 მარტი 2025, 12:22
რაგბის კლუბმა „არმიამ“ დღეს რუსთავის „ხარებს“ უმასპინძლა ავჭალის რაგბის სტადიონზე, სადაც „სარბიელის სინი“ გათამაშდა. პრიზი „ხარებს“ მოპოვებული ჰქონდათ წინა ტურში, ქუთაისის „აიაზე“ გამარჯვების შემდეგ.
ვეტერანების საქმეთა სახელმწიფო სამსახურის ინფორმაციით, ამ გამარჯვებით „არმიამ“ მეექვსე ადგილიდან მეოთხე ადგილზე გადაინაცვლა და ექვსეულში პლეი- ოფში სათამაშოდ ადგილი მოიპოვა.
დღეიდან „სარბიელის სინი“, დედაქალაქში, კერძოდ, კი ვეტერანების საქმეთა სახელმწიფო სამსახურში დაიდებს ბინას.
რაგბის კლუბი არმია და არმიელები, ძალისხმევას არ დაიშურებენ, რათა რაც შეიძლება დიდ ხანს შეინარჩუნონ მოგებული ჯილდო.
ვეტერანების საქმეთა სახელმწიფო სამსახური ულოცავს ‘’არმიელებს’’ ამ გამარჯვებას და წარმატებულ ასპარეზობას უსურვებს.
რაგბის კლუბი „არმია“, ვეტერანების საქმეთა სახელმწიფო სამსახურს, მმართველობაში, 2019 წელს გადმოეცა; 2022 წლის 18 იანვარს კი, თავდაცვის სამინისტრო, კლუბის თანადამფუძნებელი გახდა, რაც, „არმიელებისთვის“ მოტივაციის ასამაღლებლად და მათ წინაშე მდგარი გამოწვევების დასაძლევად, კიდევ ერთი, მნიშვნელოვანი პირობაა.
საქართველოში „სარბიელის სინის’’ ისტორია 1995 წელს იწყება, როდესაც, ქართული რაგბის მემატიანემ, იმხანად კი სპორტულ გაზეთ „სარბიელის“ თანამშრომელმა, ზაალ გიგინეიშვილმა ზელანდიური (1902 წელს დაარსებული) „რანფერლის ფარის“ პრინციპი ქართულ რეალობას მოარგო. თავად სინი ძველმა მორაგბემ და მოქანდაკემ, გია ჯაფარიძემ თითბრიდან გამოჭედა, დამზადების ხარჯი კი „სარბიელმა“ გაიღო. მიზეზი მარტივი იყო - წლის ნებისმიერ დროს გარკვეულიყო საუკეთესო გუნდი და ჩემპიონატის რიგით მატჩებს მეტი ეშხიც შემატებოდა.
| სარეკლამო ადგილი - 11 650 x 60 |
