სახალხო დამცველი, ლევან იოსელიანი საგამოძიებო სამსახურებს მოუწოდებს გიორგი გახარიასა და ჟურნალისტ ზვიად ქორიძეზე თავდასხმის ფაქტებზე პასუხისმგებელი პირების იდენტიფიცირება მოახდინონ და ყველა საგამოძიებო მოქმედება სწრაფად და სრულფასოვნად ჩაატარონ
"საქართველოს სახალხო დამცველი გმობს გიორგი გახარიაზე და ჟურნალისტ ზვიად ქორიძეზე თავდასხმის ფაქტებს და მოუწოდებს საგამოძიებო სამსახურებს, მოახდინონ პასუხისმგებელი პირების იდენტიფიცირება და სწრაფად და სრულფასოვნად ჩაატარონ ყველა საგამოძიებო და საპროცესო მოქმედება, მათ შორის, მოპოვებულ იქნას ვიდეო ჩანაწერები, გამოიკითხონ მოწმეები და სხვა.
სახალხო დამცველი მნიშვნელოვნად მიიჩნევს აღნიშნულ ფაქტებზე მყისიერ რეაგირებას, რათა პოლიტიკოსებსა და ჟურნალისტებზე თავდასხმა არ გახდეს წახალისებული," - ნათქვამია გავრცელებულ განცხადებაში.
ცნობისთვის, "საქართველოსთვის" ლიდერს თავს გვიან ღამით ბათუმის ერთ ერთ სასტუმროში დაესხნენ. გავრცელებული ინფორმაციით, გიორგი გახარიას ქართული ოცნების წევრები დაუპირისპირდნენ. ოპოზიციური პარტიის ლიდერი სასწრაფო დახმარების ეკიპაჟმა საავადმყოფოში გადაიყვანა. ექიმის განცხადებით, პოლიტიკოსს ცხვირის ძვლის მოტეხილობა და ტვინის შერყევა აქვს, თუმცა მან კლინიკა უკვე დატოვა.
| სარეკლამო ადგილი - 11 650 x 60 |
