ლოს ანჯელესში ხანძარი კატასტროფული სისწრაფით ვრცელდება, – ამის შესახებ „ბიბისი“ წერს.

ამჟამად ლოს ანჯელესსა და მეზობელ ვენტურას ოლქში ხანძრის, სულ მცირე, ექვსი კერა მძვინვარებს. ოფიციალური ინფორმაციით, ამ დროისთვის ხანძარი 0%-ითაა ლოკალიზებული.

ხანძარი გავრცელდა „ჰოლივუდ ჰილსში“, მათ შორის იმ ტერიტორიაზე, სადაც ცნობილი ადამიანების საცხოვრებელი სახლებია განლაგებული.

იტონში ხანძრის შედეგად დაიღუპა ხუთი ადამიანი, ათობით კი დაშავდა. ევაკუირებულია 100 000-ზე მეტი ადამიანი. დამატებით 37 000 ადამიანი იძულებული გახდა, დაეტოვებინა ცეცხლმოდებული პალისადე. ელექტროენერგიის გარეშე დარჩა 1,5 მილიონზე მეტი ადამიანი.

ხანძარი, რომელიც პალისადეს ტერიტორიაზე სამშაბათს დაიწყო, ლოს ანჯელესის ისტორიაში ყველაზე დამანგრეველი გახდა და, ოფიციალური წყაროების ცნობით, კვლავ ვრცელდება.