როგორც აწყობთ მათი გადასახედიდან, ისე ჭრიან და კერავენ ყველაფერს. დღეს სურთ, რომ სალომე ზურაბიშვილს დააჯერონ, რომ იგია მათი ლიდერი და სურთ ბოლომდე გამოიყენონ რადიკალური სცენარის განხორციელებისთვის, - განაცხადა რადიკალურ ოპოზიციაზე საუბრისას პარლამენტის ადამიანის უფლებათა დაცვისა და სამოქალაქო ინტეგრაციის კომიტეტის თავმჯდომარემ, რატი იონათამიშვილმა „დღის ქრონიკაში“ ჩართვისას.
მისივე თქმით, რადიკალების მაგიდაზე დღეს რა საკითხებიც დევს, „ყველაფერი არის ან ბოდვა, ან ფანტასმაგორია, ან მათი ილუზია“. იონათამიშვილი მიიჩნევს, რომ მათ რადიკალური გეგმების განსახორციელებლად სამართლებრივი ბერკეტი არ გააჩნიათ.
„ჩვენ კარგად ვიცით, რომ ამ რადიკალური ჯგუფების ბიბლიაცა და კონსტიტუციაც ეს არის კანვასის ტრენინგების მოდულები, აკერმანის სახელმძღვანელოები და მაკკეინის ინსტიტუტის ანგარიშები. ანუ, ეს ადამიანების დადიან იმ წრეზე, რასაც ჰქვია მაკკეინის ინსტიტუტის ანგარიშიდან აკერმანის სახელმძღვანელოებამდე. ამ ტრიალში ისინი ვერ აცნობიერებენ, რომ სინამდვილეში სულ უფრო და უფრო მძიმე სიტუაციაში იყენებენ თავს. ამ სცენარების გადმოტანა ქართულ რეალობაში, როგორი მცდელობებიც არ უნდა ჰქონდეთ მათ, არა და ვერ განხორციელდება, რადგან ჩვენი სახელმწიფო არ დაუშვებს იმას, რომ მართლაც ასეთი შრომით მოტანილი მშვიდობა, რაც ჩვენს ქვეყანაშია და განვითარების ის ტემპები, რაც არის, მათ შევალახვინოთ. ეს არ მოხდება! თავად მოუწევთ ამ პროცესების საკუთარ რიგებში ხილვა და ქვეყანაში ამას ვერ ეღირსებიან“, - განაცხადა იონათამიშვილმა.
იგი დარწმუნებულია, რომ სალომე ზურაბიშვილის მიმართ რადიკალური ოპოზიციის წარმომადგენლების მიერ 6 წლის წინ დაფიქსირებული პოზიციები არ შეცვლილა.
„უბრალოდ, როგორც აწყობთ მათი გადასახედიდან, ისე ჭრიან და კერავენ ყველაფერს. დღეს სურთ, რომ მას დააჯერონ, რომ იგია მათი ლიდერი. ეცდებიან, რომ დააჯერონ, რადგან ბოლომდე გამოიყენონ რადიკალური სცენარის განხორციელებისთვის და სხვა არაფრისთვის. სხვა მიზანი მათ არც გააჩნიათ. სინამდვილეში ხომ ეს ადამიანები ოპოზიციაში არასდროს ყოფილან“, - აღნიშნა იონათამიშვილმა.
| სარეკლამო ადგილი - 11 650 x 60 |
