მიუხედავად იმისა, რომ ევროკავშირი ცდილობს თავი დააღწიოს რუსეთის გაზზე დამოკიდებულებას, რუსული თხევადი ბუნებრივი აირის იმპორტმა ევროკავშირში წელს რეკორდულ მაჩვენებელს მიაღწია. ინფორმაციას ამის შესახებ გამოცემა Financial Times-ი ავრცელებს.

როგორც Financial Times-ი წერს, დეკემბრის შუა რიცხვებისთვის ევროკავშირმა 16.5 მილიონი ტონის მოცულობის რუსული თხევადი ბუნებრივი აირის იმპორტი განახორციელა.

აღსანიშნავია, რომ მიმდინარე წლის იმპორტი აღემატება გასული წლის მაჩვენებელს (15.18 მილიონი ტონა) და ასევე უსწრებს წინა რეკორდს, რომელიც 2022 წელს დამყარდა (15.21 მილიონი ტონა).

„რაც ვიხილეთ წელს, გასაკვირია. იმის ნაცვლად, რომ თანდათან შევამციროთ რუსული თხევადი ბუნებრივი აირის იმპორტი, მას ვზრდით“, - განაცხადა ენერგეტიკის ეკონომიკისა და ფინანსური ანალიზის ინსტიტუტის ანალიტიკოსმა, ანა მარია იალერ-მაკარევიჩმა.