მსოფლიო დონის უახლესი ინფრასტრუქტურით და სპორტისადმი გატაცებით, საქართველო მტკიცედ იკავებს ადგილს, როგორც ზამთრის სპორტის კერა სპორტული მიმართულებების გლობალურ რუკაზე, - განაცხადა ევროპის ახალგაზრდული ოლიმპიური ფესტივალის „ბაკურიანი 2025” საორგანიზაციო კომიტეტის თავმჯდომარემ რომში, მშვიდობის ცეცხლის ანთების საზეიმო ცერემონიაზე.
მამუკა ხაბარელმა სიტყვით მიმართა ღონისძიების მონაწილეებს და აღნიშნა, რომ როდესაც მშვიდობის ცეცხლი იწყებს სიმბოლურ მოგზაურობას, ის ატარებს ახალგაზრდა სპორტსმენების იმედებსა და ოცნებებს.
მისივე თქმით, საქართველო დღეებს და საათებს ითვლის, დაუვიწყარი ღონისძიების მასპინძლობისთვის.
„3 წლის წინ საქართველოს წილად ხვდა პატივი, არჩეულიყო ზამთრის EYOF-ის მასპინძლად და შეუერთდა ევროპის 7 ქვეყანას, რომლებმაც უმასპინძლეს ზამთრისა და ზაფხულის ფესტივალებს. ჩემთვის პატივია, წარვდგე თქვენს წინაშე ამ ისტორიულ ქალაქში, რომში, რომელიც არის მარადიული ერთიანობის, კულტურისა და ღირებულებების სიმბოლო- პატივია, ვმონაწილეობდე მშვიდობის ცეცხლის ანთებაში. ეს არის ტრადიცია, რომელიც ატარებს ოლიმპიური მოძრაობის სულისკვეთებას. მაშინ, როდესაც ვანთებთ მშვიდობის ცეცხლს, ნება მომეცით, უღრმესი მადლიერება გამოვხატო ყველას მიმართ, ვინც ამ ხნის განმავლობაში მხარში გვიდგას: პრეზიდენტი სპიროს კაპრალოსი, გენერალური მდივანი რაფაელ პაგნოზი და ევროპის ოლიმპიური კომიტეტების უდიდესი გუნდი, საკოორდინაციო კომისიის წევრები.
მადლობა ჩემი ქვეყნის მთავრობას წლების განმავლობაში ურყევი მხარდაჭერისთვის. გასაოცარია, ასობით მილიონის ინვესტიცია სპორტული ინფრასტრუქტურის განვითარებასა და ახალგაზრდა სპორტსმენების შთაგონების საქმეში! მოხარული ვარ, რომ ბატონი შალვა გოგოლაძე, კულტურისა და სპორტის მინისტრის პირველი მოადგილე, პრეზიდენტი ლერი ხაბელოვი და საქართველოს ეროვნული ოლიმპიური კომიტეტის გუნდი ამ დღესასწაულების აღსანიშნავად შემოგვიერთდნენ და ჩვენთან ერთად არიან.
საქართველო დღეებს და საათებს ითვლის ამ დაუვიწყარი ღონისძიების მასპინძლობისთვის. მსოფლიო დონის უახლესი ინფრასტრუქტურით და სპორტისადმი გატაცებით, საქართველო მტკიცედ იკავებს ადგილს, როგორც ზამთრის სპორტის კერა სპორტული მიმართულებების გლობალურ რუკაზე. როდესაც მშვიდობის ცეცხლი იწყებს სიმბოლურ მოგზაურობას საქართველოში, ის ატარებს ახალგაზრდა სპორტსმენების იმედებსა და ოცნებებს. დაე, მისმა ენერგიამ შთააგონოს ისინი, გადალახონ თავიანთი საზღვრები, აითვისონ სამართლიანი თამაშის სული და შექმნან ხანგრძლივი მეგობრობა, რომელიც ჩამოაყალიბებს უფრო ნათელ, უფრო მშვიდობიან ევროპას! ეს ცეცხლის ალი გვახსენებს, რომ მიუხედავად იმისა, რომ ჩვენ შეიძლება მოვდივართ სხვადასხვა ერებიდან, ენებიდან, ისტორიებიდან და ტრადიციებიდან, ჩვენ გვაერთიანებს საერთო მიზანი - შთავაგონოთ მომავალ თაობებს იოცნებონ, იბრძოლონ ბრწყინვალე წარმატებისთვის, აითვისონ ერთიანობისა და მშვიდობის ღირებულებები. ამდენად, გთხოვთ იცოდეთ, რომ ეს ცეცხლი დაიწყებს თავის მარადიულ მოგზაურობას საქართველოში, დააკაკუნებს ყველა კარზე, რათა მოუტანოს ოლიმპიური სული და ბრწყინვალების და მშვიდობის გზავნილი ყველა ოჯახს, თითოეულ ადამიანს.
ბაკურიანის, თბილისისა და ბათუმის და EYOF 2025 საორგანიზაციო კომიტეტის სახელით გულწრფელ მადლობას ვუხდით რომს ამ სიმბოლური ცერემონიის მასპინძლობისთვის”, - განაცხადა მამუკა ხაბარელმა.
| სარეკლამო ადგილი - 11 650 x 60 |
