ლექსმანი და ვიღაცები კი არა, ქართველი ჟურნალისტი მეუბნებოდა, უნდა ჩამოვიდნენ და გამოიძიონ საქართველოში რა ხდებაო. ცოტა თავმოყვარეობაც უნდა გვქონდეს, ჩემი აზრით, - ასე უპასუხა „ქართული ოცნების“ აღმასრულებელმა მდივანმა, საპარლამენტო უმრავლესობის ლიდერმა მამუკა მდინარაძემ, ჟურნალისტის მიერ დასმულ კითხვას ევროპარლამენტარ მირიამ ლექსმანის განცხადებასთან დაკავშირებით, სადაც ლექსმანი ამბობს, რომ საერთაშორისო კომისია უნდა ჩამოვიდეს საქართველოში არჩევნების გამოძიების მიზნით.
„სუვერენიტეტი რა არის? ვიღაცები პოზიციას რომ ახმოვანებენ, ვინმეს გათვითცნობიერებული აქვს სიტყვა ქვეყნის სუვერენიტეტი რას ნიშნავს? ამის მნიშვნელობა ვიცით თუ არ ვიცით? ლექსმანი და ვიღაცები კი არა, ქართველი ჟურნალისტი რამდენიმე დღის წინ მეუბნებოდა, რა მნიშვნელობა აქვს ფორმას, უნდა ჩამოვიდნენ და გამოიძიონ საქართველოში რა ხდებაო. ცოტა თავმოყვარეობაც უნდა გვქონდეს, ჩემი აზრით“, - აღნიშნა მდინარაძემ.
მან ასევე ისაუბრა ხელისუფლების ლეგიტიმაციის არ აღიარების შესახებაც.
„ამერიკის შეერთებულმა შტატებმა ლეგიტიმაცია არ მოგცათო და ჰელსინკის კომისიამ გალანძღა საკუთარი ქვეყნის პრეზიდენტის ადმინისტრაცია, პირდაპირი მნიშვნელობით, ლეგიტიმაცია რატომ არ მიეცითო. ეუთო/ოდირის დასკვნა ლეგიტიმაციას არ შეეხებოდაო და ამ დასკვნისთვის ლექსმანი ეუთო/ოდირის დასკვნას ლანძღავს, ლეგიტიმაცია რატომ მიეცითო და მერე მე მეკითხებიან, ვინ მოგცათ ლეგიტიმაციაო. მგონი ეს პასუხია ყველაფრის“, - განაცხადა მდინარაძემ.
| სარეკლამო ადგილი - 11 650 x 60 |
