უმუშევრობის 12-წლიანი შემცირებით საქართველო მსოფლიოში მეექვსე ადგილზე გადის.
საერთაშორისო სავალუტო ფონდის მსოფლიო ეკონომიკური მიმოხილვის მონაცემების მიხედვით ირკვევა, რომ საქართველო მსოფლიოს იმ ქვეყნების ათეულში მეექვსე ადგილზეა, სადაც ბოლო თორმეტი წლის მანძილზე 2024 წლისთვის ყველაზე მეტი პუნქტით მცირდება უმუშევრობა.

ფონდის შეფასებით, 12 წლის განმავლობაში, ანუ 2012 წელთან შედარებით უმუშევრობა საქართველოში 12,2 პროცენტული პუნქტით მცირდება და 2024 წელს უმუშევრობის დონე 14,5%-ს გაუტოლდება. სავალუტო ფონდის შეფასებით, ჩვენს საუკუნეში საქართველოში უმუშევრობის დონე ყველაზე მაღალი იყო 2010, 2011 და 2012 წლებში, დაახლოებით 27%-ის დონეზე.

აღსანიშნავია, რომ სავალუტო ფონდის ანგარიშის მიხედვით, ამ საუკუნეში 2012 წლამდე პერიოდში უმუშევრობის დონე მსოფლიოში ყველაზე მეტად საქართველოში გაიზარდა. უმუშევრობის მატებამ იმ 12-წლიან პერიოდში 16 პროცენტულ პუნქტს გადააჭარბა.