გამარჯვების გატანებას არ ვაპირებთ, ვაპირებთ ბოლომდე ბრძოლას, გამორიცხულია მანდატების რეალიზება, სია, მანდატები, არ არსებობს ჩვენთვის, – ამის შესახებ ჟურნალისტებს „ერთიანობა – ნაციონალური მოძრაობის“ ერთ-ერთი ლიდერმა, გიორგი ვაშაძემ განუცხადა.
„სრული კონსენსუსია, რომ ამ არჩევნების შედეგებს არავინ აღიარებს. ეს არის არა უბრალოდ გაყალბებული არჩევნები, ეს არის ტოტალურად გადაწერილი, რუსული სპეცოპერაცით შექმნილი შედეგები, რომელიც აბსოლუტურად აცდენილია ჩვენი, ყველას განწყობას. მივესალმებით პრეზიდენტის ამ სიტყვას. ხვალ, 19:00 საათზე ძალიან მნიშვნელოვანია, რომ ბევრნი ვიყოთ რუსთაველზე. ვფიქრობ, დაახლოებით 40-45-დღიანი ბრძოლა მოგვიწევს, რათა საბოლოო გამარჯვება მოვიპოვოთ, რადგან ჩვენ გავიმარჯვეთ ამ არჩევნებში და არა მათ, ვინც ამ ყალბი შედეგებით ამბობს, რომ გაიმარჯვეს. ამ გამარჯვების გატანებას არ ვაპირებთ. ვაპირებთ ბოლომდე ბრძოლას. გამორიცხულია ამ მანდატების რეალიზება. ჩვენ ამაზე უკვე გავაკეთეთ განცხადება. სია, მანდატები, არ არსებობს ჩვენთვის“, – განაცხადა გიორგი ვაშაძემ.
გიორგი ვაშაძეს ასევე კითხვა დაუსვეს იმასთან დაკავშირებით, რომ პრეზიდენტის ბრიფინგზე, რომელსაც სამი ოპოზიციური გაერთიანების წარმომადგენლები ესწრებოდნენ, არ იმყოფებოდნენ გიორგი გახარიას პარტიის წევრები, რაზეც ვაშაძემ აღნიშნა, რომ გახარიას გუნდის წევრები ბრიფინგამდე გამართულ შეხვედრაზე იყვნენ და, მისი ინფორმაციით, ისინიც იზიარებენ საერთო პოზიციას.
„შეხვედრააზე იყვნენ. ვიცი, რომ ისინიც იზიარებენ ამ პოზიციას“, – აღნიშნა გიორგი ვაშაძემ.
საქართველოს პრეზიდენტმა, სალომე ზურაბიშვილმა ბრიფინგზე განაცხადა, რომ 26 ოქტომბრის საპარლამენტო არჩევნების შედეგებს არ აღიარებს და სამ ოპოზიციურ გაერთიანებასთან ერთად აქციებს აანონსებს.
| სარეკლამო ადგილი - 11 650 x 60 |
