![](/img/multimedia/a102620_111640_1720616102151764b.jpg)
დასავლეთი არა მმართველ გუნდს, არამედ ქართველ ხალხს ებრძვის, რადგან მმართველი გუნდი სწორედ ქართველმა ხალხმა აირჩია. მათ (პარტნიორებმა) პირდაპირ უნდა გვითხრან, რატომ უგულებელყოფენ ქართველი ხალხის არჩევანს, ეს ხომ კოლონიალური დამოკიდებულება არის, დემოკრატია ასე არ მუშაობს, - ამის შესახებ ექსპერტი დავით ჩიხელიძე სოციალურ ქსელში წერს.
იგი გამოეხმაურა გერმანიის ელჩის განცხადებას, რომლის თანახმადაც, გერმანია საქართველოსთან ურთიერთობას გადახედავს, „თუ ქართველებს ევროკავშირში გაწევრიანება სურთ, მთავრობა ჩვენს კურსს უნდა დაუბრუნდეს“.
„თბილისში ორი დღის განმავლობაში შეხვედრები დახურულ ფორმატში მიმდინარეობს, სადაც ევროკავშირის კანდიდატი ქვეყნების წარმომადგენლები განიხილავენ ევროკავშირში გაწევრების გზაზე თითოეული ქვეყნის შემდგომ ნაბიჯებს. შეხვედრას არასამთავრობო სექტორის წარმომადგენლები და ელჩები ესწრებიან.
გერმანიის ელჩის განცხადებით, გერმანია საქართველოსთან ურთიერთობას გადახედავს, „თუ ქართველებს ევროკავშირში გაწევრიანება სურთ, მთავრობა ჩვენს კურსს უნდა დაუბრუნდეს“.
ზოგადად, ბუნდოვანია, რას ნიშნავს სიტყვათა წყობა „ჩვენი კურსი“, მაგრამ საინტერესოა, რატომ არავინ საუბრობს საქართველოს კურსის მნიშვნელობაზე და იმაზე, თუ რაოდენ მნიშვნელოვანია საქართველოს მთავრობამ ის კურსი გაატაროს, რომელიც აუცილებელია ჩვენი მოსახლეობის კეთილდღეობისთვის“, - წერს ჩიხელიძე.
მისი თქმით, საქართველო პარტნიორებისგან მეტ პატივისცემას იმსახურებს.
„დასავლეთი არა მმართველ გუნდს, არამედ ქართველ ხალხს ებრძვის, რადგან მმართველი გუნდი სწორედ ქართველმა ხალხმა აირჩია. მათ (პარტნიორებმა) პირდაპირ უნდა გვითხრან, რატომ უგულებელყოფენ ქართველი ხალხის არჩევანს, ეს ხომ კოლონიალური დამოკიდებულება არის, დემოკრატია ასე არ მუშაობს, დემოკრატია არჩევანის თავისუფლებაა და არა ზემოდან „შემოგდებული“ ხელოვნური არჩევანის გაკეთების იძულება.
საქართველო პარტნიორებისგან მეტ პატივისცემას და დაფასებას იმსახურებს. ბოდიში, თუ ცალ ფეხზე დგომა საქართველოს ინტერესებში არ შედის!
პ.ს. ცალკე აღნიშვნას იმსახურებს კონფერენციის ფაქტი, რომელიც დახურულ სივრცეში, მმართველი გუნდისგან და საქართველო საკანონმდებლო ორგანოსგან დამოუკიდებლად ტარდება, შეუძლებელია ევროინტეგრაციაზე საქართველოს პარლამენტის წევრების გარეშე ისაუბრო. ეს შეურაცხმყოფელი და არასერიოზული, არასაქმიანი მიდგომა არის!“, - წერს დავით ჩიხელიძე.
სარეკლამო ადგილი - 11 650 x 60 |