63
11 ივნისი 2024, 16:56
![](/img/multimedia/a100990_109944_1718110691841845b.jpg)
როგორც ფინანსთა მინისტრის პირველმა მოადგილემ გიორგი კაკაურიძემ განაცხადა, 2023 წლის ბიუჯეტი თავდაპირველად დაგეგმილი იყო 5 %-იანი ზრდის პროგნოზით, მაგრამ წლის პირველი ნახევრის ანალიზის შემდეგ წლის მეორე ნახევარში პროგნოზი განახლდა და 6,5% გახდა, თუმცა ფაქტობრივი მაჩვენებლებით გასულ წელს ეკონომიკის რეალური ზრდა 7,5% იყო.
ამავდროულად, მთლიანი შიდა პროდუქტის (მშპ) ნომინალური ზრდა იყო 10,1% და ჯამში 80 მილიარდ 246 მლნ ლარი შეადგინა, რაც ერთ სულ მოსახლეზე 21 ათას 575 ლარია (8 210 აშშ დოლარი).
მისივე თქმით, მნიშვნელოვანია, რომ გასულ წელს ყველა დარგში დაფიქსირდა ზრდა, ამავდროულად დაბალი იყო ინფლაცია და მან 2,5% შეადგინა.
მომხსენებელმა დეტალურად ისაუბრა ბიუჯეტის შესრულების პარამეტრებზე.
„ძალიან მნიშვნელოვანი იყო საგარეო სექტორის როლი ჩვენს ეკონომიკაზე. საგარეო ვაჭრობის ნაწილში გვქონდა 12,9%-იანი ზრდა, რამაც 21 მილიარდ 605 მილიონი დოლარი შეადგინა. მათ შორის ექსპორტი 6 მილიარდ 90 მლნ დოლარი, იმპორტის მაჩვენებელი კი 15 მილიარდ 514 მლნ დოლარი იყო“, - განაცხადა გიორგი კაკაურიძემ.
რაც შეეხება საგარეო სექტორის მეორე მიმართულებას ტურიზმს, გასულ წელს ტურიზმიდან ქვეყნის ეკონომიკაში ფულადი შემოდინებები 17 %-ით გაიზარდა, რამაც 4 მილიარდ 125 მილიონი დოლარი შეადგინა. პირდაპირი უცხოური ინვესტიციების სახით 1 მილიარდ 559 მილიონ დოლარამდე იყო შემოსავალი.
რაც შეეხება ნაერთი ბიუჯეტის პარამეტრებს, გასულ წელს დაგეგმილი მაჩვენებელი შესრულებულია 102,2 %-ით და შემოსავლის სახით ბიუჯეტმა 22 მილიარდ 124 მილიონი ლარი მიიღო. გეგმასთან მიმართებაში გადასახადო შემოსავლების შესრულება 101, 7% იყო.
გიორგი კაკაურიძემ დეტალურად ისაუბრა უწყებების მიხედვით ბიუჯეტის შესრულების პარამეტრებზე. მისი განცხადებით, ეკონომიკისა და მდგრადი განვითარების სამინისტროს შესრულება 102%-ია, ინფრასტრუქტურისა და რეგიონული განვითარების სამინისტროს შესრულების მაჩვენებელი 102,6%-ია.
მომხსენებელმა მიმდინარე წლის პროგნოზებზეც ისაუბრა და განაცხადა, რომ წლევანდელი (2024 წ.) ბიუჯეტი დაგეგმილია 2,5 % დეფიციტზე და 5,2% ეკონომიკურ ზრდაზე.
„4 თვის მონაცემების ანალიზის შედეგად წარმოდგენილია განახლებული პროგნოზი და წელს ველოდებით ეკონომიკური ზრდის მაჩვენებლის ზრდას 6%-მდე. ინფლაციაც მიზნობრივი მაჩვენებლის ფარგლებში იქნება, რაიმე მნიშვნელოვან გადახრებს არ ველოდებით. ასევე 2,5%-დან ეტაპობრივად კლებულობს და 2,2%-მდე ჩამოდის დეფიციტი. რაც შეეხება სამინისტროების ძირითად მიმართულებებს, ამ ეტაპზე ის ძირითადად პარლამენტის მიერ დამტკიცებული სამთავრობო პროგრამების მიხედვით მიმდინარეობს“,- განაცხადა გიორგი კაკაურიძემ.
კომიტეტმა მხარი დაუჭირა განხილული საკითხის პლენარულ სხდომაზე გატანას.
სარეკლამო ადგილი - 11 650 x 60 |