პარლამენტი დღეიდან იმ საკანონმდებლო ცვლილებათა პაკეტების განხილვას უბრუნდება, რომლის მომზადება მმართველი გუნდის განმარტებით, ევროკავშირის რეკომენდაციების შესრულებასა და საქართველოსთვის კანდიდატის სტატუსის მინიჭებას უკავშირდება.
დღეს, პარლამენტის იურიდიულ საკითხთა კომიტეტის სხდომა გაიმართება, სადაც მეორე მოსმენით - მუხლობრივად “სპეციალური საგამოძიებო სამსახურის შესახებ“, “პერსონალურ მონაცემთა დაცვის შესახებ“, “კორუფციის წინააღმდეგ ბრძოლის შესახებ“ და “საერთო სასამართლოების შესახებ“ კანონებში დაგეგმილ ცვლილებებს განიხილავენ.
იურიდიულ საკითხთა კომიტეტის სხდომა 09:00 საათზეა ჩანიშნული.
„აწყვეტილი პროპაგანდის და სიცრუის ნიაღვარის ფონზე ჩვენ ვუბრუნდებით ევროპულ დღის წესრიგს, პარლამენტში განვიხილავთ ევროკავშირთან დასაახლოებელ კანონპროექტებს 9 ნაბიჯიდან გამომდინარე. ამ გზაზე მიზანდასახულად მივდივართ წინ, საკითხები გავლილი და დამუშავებულია“, - განაცხადა ფრაქცია „ქართული ოცნების“ თავმჯდომარის პირველმა მოადგილემ გია ცაგარეიშვილმა.
| სარეკლამო ადგილი - 11 650 x 60 |
