53
23 აპრილი 2024, 14:31
ადარებდნენ ამ დღეებში [„ქართული ოცნების“ დაანონსებულ შეკრებას] ასლან აბაშიძის მიერ გამოყვანილ ხალხს, შევარდნაძის მიერ გამოყვანილ ხალხს, სააკაშვილის მიერ გამოყვანილ ხალხს, ოღონდ განსხვავება იცით, რაშია? ყველა შემთხვევაში მათი რეიტინგები იყო პლინტუსს ქვემოთ, ფსკერზე, - ამის შესახებ ჟურნალისტებს საპარლამენტო უმრავლესობის ლიდერმა, „ქართული ოცნების“ აღმასრულებელმა მდივანმა, მამუკა მდინარაძემ განაცხადა.
„შევარდნაძის ხელისუფლებამ თბილისში თვითმმართველობის არჩევნებში 2% მიიღო, თუ არ ვცდები. აქცია რომ ჩაატარეს, იმის წინა არჩევნებში მიიღეს 2%. სააკაშვილს რომ არ გაეყალბებინა, იმ პროცენტსაც ვერ მიიღებდა. ჩვენ გვაქვს 60%-ზე მეტი რეიტინგი და რამდენად სულელური და არარელევანტური შედარებაა, ხვდებით? ამიტომ გაითავისეთ, რომ ასლან აბაშიძის, შევარდნაძის, სააკაშვილის ხელისუფლებები იყვნენ ძალიან დიდ ფრუსტრაციაში, ხოლო ჩვენ ხელისუფლებაში ყოფნის მე-12 წელს ვართ ყველაზე მაღალი რეიტინგის პირობებში. ეს განსხვავება არის არსებითი“, - აღნიშნა მამუკა მდინარაძემ.
„ქართული ოცნება“ მხარდამჭერების თხოვნით 29 აპრილს, საქართველოს პარლამენტის სასახლის წინ საყოველთაო-სახალხო შეკრებას ჩაატარებს. „ერთად ვუთხრათ არა - შავ ფულს და ერთად ვუთხრათ კი - გამჭვირვალობას, ჭეშმარიტ ევროპულ გზას, დამოუკიდებელ და სუვერენულ საქართველოს!“ - ვკითხულობთ მმართველი გუნდის ერთობლივ განცხადებაში. „ქართულ ოცნებაში“ აცხადებენ, რომ საკითხის ირგვლივ ოპოზიციის მიერ გამოხატული აჟიოტაჟი მორიგი დასტურია იმისა, რომ მათთვის ქართულ ეროვნულ ღირებულებებზე მდგარი საზოგადოება შიშისმომგვრელია.
სარეკლამო ადგილი - 11 650 x 60 |