ბელარუსში საპრეზიდენტო არჩევნები შედგა, – ამის შესახებ ქვეყნის ცენტრალური საარჩევნო კომისიაში განაცხადეს.
ბელარუსის ცენტრალური საარჩევნო კომისიის თავმჯდომარის ლიდია ერმოშინას განცხადებით, აქტივობამ ქვეყნის ყველა რეგიონში, დედაქალაქის გარდა, 60 პროცენტს გადააჭარბა. მინსკში აქტივობა ჯერჯერობით 53 პროცენტია.
მისი თქმით, საჩივრები, რომლებიც დამკვირვებლებმა ზოგიერთ უბანში წარმოადგინეს, ერთი ტიპის არის. თუმცა, ცესკო-ს თავმჯდომარეს არ დაუკონკრეტებია, რა სახის დარღვევებზეა საუბარი. ერმოშინას განცხადებით, მას ექმნება შთაბეჭდილება, რომ ამ საჩივრებს ერთი და იგივე დამკვირვებლები აფიქსირებენ.
ბელარუსში საპრეზიდენტო არჩევნებში გამარჯვებისთვის სულ ხუთი კანდიდატი იბრძვის. მათ შორის მოქმედი პრეზიდენტი, 65 წლის ალექსანდრ ლუკაშენკო, რომელიც გამარჯვების შემთხვევაში, პოსტს მეექვსე ვადით დაიკავებს.
საარჩევნო უბნები ადგილობრივი დროით 20:00 საათზე დაიხურება, რის შემდეგაც ცნობილი გახდება ეგზიტპოლის შედეგები.
| სარეკლამო ადგილი - 11 650 x 60 |
