მოდის ფრანგულმა სახლმა აუქციონზე მსოფლიო რეკორდი დაამყარა. Hermes Diamond Himalaya Birkin 25-ის ჩანთა, ე.წ. ტომარა, Christie's-ის აუქციონზე 380 000 აშშ დოლარად გაიყიდა.
Hermes Diamond Himalaya Birkin 25-ის ჩანთა, იშვიათობაა, ის ნილოსის ნიანგის ტყავისგანაა შეკერილი და 18-კარატიანი თეთრი ოქროთი და 245 ბრილიანტითაა დაფარული.
აუქციონში ჩანთის ყიდვის მსურველები 29 ქვეყნიდან ჩაერთნენ. მათგან 34 პროცენტი აუქციონში პირველად მონაწილეობდა.
Hermes Diamond Himalaya Birkin 25-ის ახალი მფლობელის ვინაობა კონფიდენციალურია.
მსოფლიოში ყველაზე ცნობილი ჩანთა ბირკინი 80-იანი წლების დასაწყისში შეიქმნა. ინგლისელი მსახიობი და მომღერალი ჯეინ ბირკინი ერთხელ მგზავრობდა Hermès -ის სახლის მეპატრონე ჟან-ლუი დიუმასთან ერთად და მასთან საუბარში დაიჩივლა, რომ ჩანთას Hermès Kelly მოუხერხებელი შესაკრავი ჰქონდა და მასში სამგზავროდ აუცილებელ ნივთებს ვერ ატევდა.
ჟან-ლუი დაპირდა მას, რომ სპეციალურად მისთვის შექმნიდა ჩანთას. 1984 წელს გაჩნდა Hermès-ის ლეგენდარული ჩანთა, რომელსაც ჯეინის საპატივცემულოდ დაარქვეს "ბირკინი". ჩანთის ღირებულება 6000 დოლარიდან იწყება. თითოეული ჩანთა ხელით იქმნება, რაზეც 18-25 საათი იხარჯება, ამის გამო, კვირის განმავლობაში Hermès ქმნის არაუმეტეს ხუთ ჩანთას.
ჩანთის დამზადებისას გამოიყენება სხვადასხვა მასალა - ხბოს, ნიანგის, ხვლიკის, სტრაუსის და ა.შ. ტყავი. ფურნიტურა მზადდება ოქროს ან პალადიუმისგან და იკეტება საკეტით, რომელსაც საკუთარი უნიკალური ნომერი გააჩნია.
ცნობილია, რომ ვიქტორია ბექჰემს 100 ცალი "ბირკინი" აქვს.
სარეკლამო ადგილი - 11 650 x 60 |