ბოლნისის მუნიციპალიტეტის სოფელ მუშევანში მცხოვრებ კიდევ ოთხ პირს კორონავირუსი დაუდგინდა.

 მათი ინფიცირების წყარო ცნობილია და ამ დრომდე დადასტურებული შემთხვევების კონტაქტები არიან.

ამ დროისთვის სოფელ მუშევანში კორონავირუსის 54 დადასტურებული ფაქტია. სოფელში  25 აპრილის შემდეგ მკაცრი საკარანტინო რეჟიმი მოქმედებს.

გამოსაკვლევად სულ ლაბორატორიაში 97 პირის ტესტი იყო გადაგზავნილი. მათ შორის, 88 ბიოლოგიური ნიმუში სოფელ მუშევანიდან იყო აღებული, ცხრა კი, ქალაქ ბოლნისიდან.

ამ დროისთვის, ბოლნისის მუნიციპალიტეტში კორონავირუსის 160 დადასტურებული შემთხვევაა, მათგან 66 გამოჯანმრთელდა, სამი გარდაიცვალა.

რამდენიმე დღის წინ კარანტინი მოიხსნა რვა სოფელში, თუმცა, ამ დრომდე მუნიციპალიტეტში კვლავ რჩება ჩაკეტილი ზონები, მათ სორისაა სოფელი მუშევანი. ეს, სწორედ, ის სოფელია, სადაც არ შეუშვეს სასწრაფო დახმარების ბრიგადები და პოლიცია, იმის გამო, რომ არ სჯერათ კორონავირუსის არსებობის. ამის გამო, სოფლის მოსახლეობამ ფიზიკური წინააღმდეგობა გაუწია მედიკოსებს. თუმცა, მომდევნო დღეებში სიტუაცია მოწესრიგდა.