სააგენტო "აფსნიპრესის" ინფორმაციით, ოკუპირებულ აფხაზეთში კორონავირუსის ორი ახალი შემთხვევა გამოვლინდა და მთლიანობაში, დაავადებულთა რაოდენობა 14-მდე გაიზარდა.
„გასული დღე-ღამის განმავლობაში, ტესტირება 27 ადამიანს ჩაუტარდა. ორ მათგანს კოვიდინფექცია დაუდასტურდა. ერთ-ერთი მათგანი რუსეთის უმაღლესი სასწავლებლის სტუდენტია, რომელიც ამ დღეებში ჩამოვიდა აფხაზეთში, მეორე - გუდაუთის მე-7 რუსული სამხედრო ბაზის სამხედრო მოსამსახურეა, რომელიც დაღესტნიდან ჩამოვიდა“ , - ასეთია ე.წ. ოპერატიული შტაბის ინფორმაცია.
ორიდან ერთი პაციენტი გუდაუთის ცენტრალურ საავადმყოფოში გაიგზავნება, მეორე კი გუდაუთის სამხედრო ბაზის ლაზარეთში იმკურნალებს.
ე.წ. ოპერატიული შტაბის ინფორმაციით, კარანტინის პერიოდი რვა ადამიანს დაუმთავრდა და არც ერთ მათგანს ვირუსი არ დაუდგინდა. სასტუმრო „აიტარში“ ამ დროისთვის 250-ზე მეტი ადამიანი იმყოფება კარანტინში, მათგან 218 მოსკოვის და სანქტ-პეტერბურგის სამხედრო სასწავლებლის კურსანტია.
ამ დროისთვის ოკუპირებულ აფხაზეთში 14 კოვიდინფიცირებულია. მთლიანობაში, ოკუპირებულ აფხაზეთში კორონავირუსი 17 ადამიანს დაუდასტურდა, რომელთაგან ორი გამოჯანმრთელდა, ერთი - 92 წლის ქალი გარდაიცვალა.
| სარეკლამო ადგილი - 11 650 x 60 |
