მიშა სააკაშვილი დღეს გახდა ტაბუ „რესპუბლიკური პარტიისთვის“, რომლებსაც არავითარი სიწმინდე, რომელიც კრიტიკას არ ექვემდებარება ამ დედამიწის ზურგზე არ გააჩნია, - ამის შესახებ იუსტიციის მინისტრმა „იმედის“ გადაცემა „ღია ეთერში“ განაცხადა. თეა წულუკიანის თქმით, მისთვის გაუგებარია, რატომ აკრიტიკებს პარტიის ერთ-ერთი ლიდერი ყველას საქართველოს ყოფილი პრეზიდენტის გარდა.

„ის, რასაც სახელი არ აქვს, ალბათ ძნელია სახელი დაარქვა. იმიტომ, რომ ის ჯაჭვი წარსული განცხადების, რაც თქვენ დღევანდელ ეთერში აჩვენეთ და რასაც მე ვისმენდი ცალსახად აჩვენებს იმას, რომ ძნელია ამ ყველაფერს და შემდეგ უკვე „რესპუბლიკელების“ დღევანდელ პოზიციას მოუძებნო რაიმე ტიპის სახელი. 

ერთი კი ფაქტია, რომ ბატონი ლევან ბერძენიშვილი, ყველა იცნობს, ფართო საზოგადოება იცნობს, მეც ვიცნობ და არ შემეშლება თუ ვიტყვი, რომ ის არ არის ადამიანი, რომელსაც ყველაფერზე თავისი აზრი არ აქვს. პირიქით, ეს არის ადამიანი, რომელსაც თავისი მწვავე და კრიტიკული აზრი აქვს ყველაფერზე:  ილია მეორეზე, ეკლესიაზე. თუ უფრო განვიტვირთებით და გავიხუმრებთ კიდეც, იმასაც ვიტყვი, რომ მიუშვა, ალბათ წმინდა ნინოსაც გააკრიტიკებს, არგუმენტებსაც მოძებნის ამისთვის. მაგრამ ის, ვისაც დღეს ვერ გააკრიტიკებს და არ აკრიტიკებს, ეს არის მიშა სააკაშვილი. რა სახელი უნდა დაერქვას ამას მე არ ვიცი, მაგრამ ფაქტია, რომ ეს არის მძიმე სანახავი“, - განაცხადა თეა წულუკიანმა.