301
07 აგვისტო 2020, 12:35
„საერთაშორისო გამჭვირვალობა -საქართველოს" ხელმძღვანელის ეკა გიგაურის განცხადებით, ყველას უნდა ახსოვდეს, რომ მთავრობის ანტიკრიზისული მხარდაჭერის მესამე ეტაპიდან გამომდინარე დახმარება არა რომელიმე პოლიტიკური პარტიიდან, არამედ სახელმწიფო ბიუჯეტიდან მოდის.
როგორც მან ჟურნალისტებს განუცხადა, ბევრ მოქალაქეს მთავრობისგან დახმარება სჭირდება.
მისივე თქმით, ცხადია, ეს ყველაფერი გავლენას მოახდენს ამომრჩეველზე.
„ჩვენ ყველამ უნდა ვიცოდეთ, რომ დღეს საქართველო არის ძალიან რთულ ვითარებაში. გვყავს ბევრი მოქალაქე, რომელსაც ეს კრიზისი შეეხო. მათ მთავრობიდან დახმარება ნამდვილად სჭირდებათ. როცა პირველად ამ დახმარებებზე საუბრობდა მთავრობა, მაშინვე ვსაუბრობდით, რომ მეტ ადამიანს უნდა შეეხოს ეს დახმარებები და სოციალური პროგრამები. ჩვენი მთავარი პრობლემა არის ის, რომ რატომღაც მოქალაქეები ვერ ხედავ ზღვარს პოლიტიკურ პარტიასა და მთავრობას შორის. ამ შემთხვევაში, მათ უნდა ახსოვდეთ, რომ ეს დახმარება სახელმწიფო ბიუჯეტიდან მოდის. ჩვენი მოქალაქეების მიერ გადახდილი გადასახადებიდან. ეს არ არის რომელიმე პოლიტიკური პარტია, რომელიც მათ ეხმარება, ეს არის სახელმწიფო ბიუჯეტი და ეს ბიუჯეტი არის ყველასი, მიუხედავად იმისა ვინ იქნება ხელისუფლებაში“, - განაცხადა გიგაურმა.
მისივე თქმით, ეს რომ ყოფილიყო არაკოვიდის შემდეგ პერიოდი, იტყოდნენ, რომ ეს არის საარჩევნოდ მოტივირებული ხარჯი.
„თუმცა, ამ შემთხვევაში ვხედავთ იმას, რომ არსებობს საჭიროება და მნიშვნელოვანია ხელისუფლებამ აუხსნას მოქალაქეებს, რომ ეს არ არის პარტიის დახმარება. ეს არის მთავრობის დახმარება და ბიუჯეტიდან დახმარება“, - განაცხადა ეკა გიგაურმა.
სარეკლამო ადგილი - 11 650 x 60 |