ჩვენ მადლობელი ვართ პრეზიდენტ შარლ მიშელის პირადი ჩართულობისთვის. მისი დღევანდელი ვიზიტი კიდევ ერთი თვალსაჩინო დადასტურებაა, თუ რამდენად მნიშვნელოვანია საქართველო და მისი წარმატება ევროკავშირისთვის, - ამის შესახებ საქართველოს პრემიერ-მინისტრმა, ირაკლი ღარიბაშვილმა ევროპული საბჭოს პრეზიდენტთან, შარლ მიშელთან შეხვედრის შემდეგ განაცხადა.
„პრეზიდენტმა მიშელმა პირველად, ბედნიერი და ამაყი ვარ, რომ პრეზიდენტი მიშელის ჩართულობით, შედეგი სახეზეა, შეთანხმება შედგა. შეიძლება ითქვას, რომ საქართველოში ხელოვნურად შექმნილი კრიზისი დასრულებულია. ამისთვის, პრეზიდენტი მიშელი გულწრფელ მადლობას იმსახურებს. ჩვენი მთავრობის, ჩვენი პოლიტიკური გუნდის სახელით, მას მადლობას ვუხდი, იმ დიდი ძალისხმევისთვის, რომელიც მან გასწია. მან დაამტკიცა, რომ არის ნამდვილი ლიდერი, შეუძლია ევროკავშირის ეგიდით, წარმატებული მედიაცია და მოლაპარაკების წარმოება - კონკრეტული შედეგის დასრულებით“ - აღნიშნა ირაკლი ღარიბაშვილმა.
დღესვე შარლ მიშელისა და საქართველოს პრეზიდენტის, სალომე ზურაბიშვილის პირისპირ შეხვედრა გაიმართა. ამასთანავე, ვიზიტის ფარგლებში ევროპული საბჭოს პრეზიდენტი პარლამენტის თავმჯდომარეს, არჩილ თალკვაძესა და პოლიტიკური პარტიების წარმომადგენლებს პარლამენტში შეხვდება. დღის ბოლოს, სალომე ზურაბიშვილის სახელით, შარლ მიშელის პატივსაცემად სადილი გაიმართება.
სარეკლამო ადგილი - 11 650 x 60 |