245
27 თებერვალი 2021, 21:54
უკანონოდ დაკავებული ზაზა გახელაძის ჯანმრთელობის მდგომარეობა არის დამაკმაყოფილებელი, ცენტრალური ხელისუფლების მხრიდან იდგმება ყველა ნაბიჯი და გამოყენებულია ყველა ბერკეტი მის გასათავისუფლებლად, - ამის შესახებ ტელეკომპანია „იმედის“ გადაცემა „შაბათის ქრონიკაში“ სახელმწიფო უსაფრთხოების სამსახურის საინფორმაციო ანალიტიკური დეპარტამენტის წარმომადგენელმა თამთა გოგუაძემ განაცხადა.
„ამ პროცესში დიდი მნიშვნელობა აქვს ჩვენი საერთაშორისო პარტნიორების, ჟენევის საერთაშორისო დისკუსიების თანათავმჯდომარეების ჩართულობას. გიდასტურებთ, რომ ყველა ჩვენი ბერკეტი და თანაპარტნიორი ჩართულია მისი გათავისუფლების პროცესში. ამ ეტაპზე ველოდებით კონკრეტული კონტურების გამოკვეთას, თუ როგორ და როდის გათავისუფლდება ზაზა გახელაძე უკანონო პატიმრობიდან“, - აღნიშნა თამთა გოგუაძემ.
მისი თქმით, ინციდენტების პრევენციისა და მათზე რეაგირების მექანიზმის (IPRM) შეხვედრას ქართული მხარე დიდი ხანია ითხოვს.
„ჩვენი ხმრიდან მზაობაა, რომ (IPRM) შეხვედრა გაიმართოს 5 მარტს, თუმცა ეს არაა საბოლოო თარიღი და ველოდებით საბოლოო დადასტურებას“, - აღნიშნა გოგუაძემ.
ოკუპირებული ცხინვალის ე.წ. სასამართლომ ზაზა გახელაძეს 12 წლითა და 6 თვით უკანონო პატიმრობა მიუსაჯა. ოკუპანტებმა ზაზა გახელაძე 11 ივლისს დაჭრეს და დააკავეს.
| სარეკლამო ადგილი - 11 650 x 60 |
